பி.வாசு படத்தில் நடிக்கவில்லை: ஐஸ்வர்யாராய் அறிக்கை

பி.வாசு இயக்கும் ‘‘ஐஸ்வர்யாவும் ஆயிரம் காக்காவும்’’ என்ற படத்தில் ஐஸ்வர்யாராய் நடிக்கப் போவதாக செய்தி வெளியானது. இந்த படத்தின் கதையை பி.வாசுவிடம் கேட்ட ஐஸ்வர்யாராய் ‘வாவ்’ என சொல்லி தனது மகிழ்ச்சியை வெளிப்படுத்தியதாக வாசு தரப்பில் வெளியிடப்பட்ட செய்தி குறிப்பில் தெரிவிக்கப்பட்டு இருந்தது. 

வெளிநாட்டு அனிமேட்ரானிக்ஸ் நிபுணர்கள் இதில் பணியாற்ற உள்ளனர் என்றும் இந்தியாவில் பெரிய அரங்குகள் அமைத்து காட்சிகள் பட மாக்கப்படுகிறது என்றும் கூறப்பட்டது. இதனை ஐஸ்வர்யாராய் மறுத்துள்ளார். அவர் கூறும்போது, ‘‘பி.வாசு படத்தில் நடிப்பது பற்றி முடிவு எடுக்கவில்லை. என்னிடம் 60–க்கும் மேற்பட்டோர் கதை சொல்லி உள்ளனர். அதில் ஒரு கதையாக பி.வாசு சொன்ன கதையும் இருக்கலாம்’’ என்றார். 

ஐஸ்வர்யாராய் சார்பில் அவரது செய்தி தொடர்பாளர் வெளியிட்டுள்ள அறிக்கையில் கூறி இருப்பதாவது:– 

பி.வாசு இயக்கும் படத்தில் ஐஸ்வர்யாராய் நடிக்கப் போவதாக செய்திகள் வந்துள்ளன. நிறைய பேர் ஐஸ்வர்யாராயை அணுகி கதைகள் சொல்லி உள்ளனர். அதில் பி.வாசு சொன்ன கதையும் ஒன்றாக இருக்கலாம். அந்த படத்தில் நடிப்பது குறித்து முடிவு எடுக்கவில்லை. பி.வாசு படத்தில் நடிக்க போவதாக செய்திகள் வந்ததும் நிறைய பேர் அணுகி விசாரித்தார்கள். அவர்களுக்கு விளக்கம் அளிக்கவே இது வெளியிடப்படுகிறது என்று அறிக்கையில் குறிப்பிடப்பட்டு உள்ளது.