சூர்யா படத்தில் குத்து பாடல் ஆட சனா கான் திடீர் மறுப்பு

சூர்யா படத்தில் குத்து பாடலுக்கு நடனம் ஆட மறுத்துவிட்டார் சனா கான். சிலம்பாட்டம், தம்பிக்கு இந்த ஊரு, ஆயிரம் விளக்கு போன்ற படங்களில் நடித்திருப்பவர் சனா கான். சில்க் ஸ்மிதா வாழ்க்கையை பின்னணியாக வைத்து உருவான ஒரு நடிகையின் டைரி என்ற படத்தில் சில்க் வேடம் ஏற்று நடித்தார்.

 தமிழில் பட வாய்ப்புகள் குறைந்ததை அடுத்து பாலிவுட் பக்கம் வாய்ப்பு தேடி சென்றார். சல்மான் கான் நடத்தும், பிக் பாஸ் ரியாலிட்டி ஷோவில் பங்கேற்ற சனாவுக்கு பின்னர் சல்மான் தான் நடித்த ஜெய் ஹோ என்ற படத்தில் நடிக்க வாய்ப்பு கொடுத்தார். இதற்கிடையில் தமிழில் லிங்குசாமி இயக்கத்தில் சூர்யா நடிக்கும் படத்தில் குத்து பாடல் ஆடுவதற்காக சனாவிடம் கால்ஷீட் கேட் கப்பட்டது. 

Sana Khan

இந்தி படத்தில் நடிப்பதை காரணம் காட்டி சூர்யா படத்தில் நடிக்க மறுத்துவிட்டார். இதுபற்றி சனா கூறும்போது, சூர்யா படத்தில் நடிக்க ஆசை தான். ஆனால் சல்மானுடன் நடித்துள்ள ஜெய் ஹோ படம் விரைவில் திரைக்கு வரவுள்ளது. 

இது எனக்கு பெரிய படம். இப்பட குழுவினருடன் நான் பட புரமோஷன் நிகழ்ச்சிகளுக்காக வெவ்வேறு ஊர்களுக்கு சென்று கொண்டிருக்கிறேன். அடுத்த 2 மாதங்களுக்கு என்னால் கால்ஷீட் தர முடியாது. குத்து பாடலுக்காக நான் கால்ஷீட் ஒதுக்குவது முடியாத காரியம். ஆனால் தமிழில் நிச்சயம் நடிப்பேன். லிங்குசாமி, சூர்யாவுடன் இணைந்து இன்னொரு முறை வாய்ப்பு வரும் பட்சத்தில் நடிப்பேன் என்றார்.