சூர்யாவின் ரகசிய விருந்து

கமெரா மேன் சந்தோஷ் சிவனுக்கு ரகசிய விருந்து கொடுத்துள்ளார் சூர்யா.

லிங்குசாமி இயக்கத்தில் சூர்யா நடிக்கும் அஞ்சான் படத்தின் படப்பிடிப்பு மும்பையில் நடக்கிறது.

இப்படத்துக்கு சந்தோஷ் சிவன் கமெராமேன். சமீபத்தில் இவருக்கு மத்திய அரசு பத்மஸ்ரீ விருது அறிவித்தது.

இதையடுத்து படப்பிடிப்பில் இருந்த சூர்யா மற்றும் டெக்னீஷியன்கள் அவருக்கு வாழ்த்து சொன்னார்கள். சந்தோஷுக்கு விருந்து கொடுத்து பாராட்ட சூர்யா முடிவு செய்தார்.

அங்குள்ள ஸ்டார் ஹோட்டலில் இதற்கான ஏற்பாடுகளை ரகசியமாக செய்தார். பட குழுவினருக்கு மட்டும் விருந்து ஏற்பாடு பற்றி சொல்லப்பட்டது. இதுபற்றி சந்தோஷிடம் யாரும் சொல்ல வேண்டாம் என்று சூர்யா கேட்டுக்கொண்டார்.

படப்பிடிப்பு முடிந்ததும் சந்தோஷிடம் பேசிய இயக்குனர் அடுத்த காட்சியை படமாக்க புதிய லொகேஷன் பார்க்கப் போகலாம் என்று சொல்லி அவரை காரில் அழைத்துச் சென்றார்.

குறிப்பிட்ட லொகேஷனுக்கு போய் சேர்ந்தனர். அதை பார்வையிட்ட லிங்குசாமி, இந்த லொகேஷன் பொருத்தமாக இருக்காது வேறு இடம் பார்க்கலாம் என்று புறப்பட்டார். கார் நட்சத்திர ஹோட்டலுக்கு போய் நின்றது.

காரிலிருந்து இறங்கிய சந்தோஷை அழைத்துக்கொண்டு விழா ஏற்பாடு செய்திருந்த ஹாலுக்கு சென்றார் லிங்குசாமி.

அங்கு சூர்யா மற்றும் பட குழுவினர் திரண்டிருந்தனர். சந்தோஷ் உள்ளே நுழைந்ததும் அவருக்கு கைகுலுக்கி வாழ்த்து சொன்னார்கள். சூர்யா பூச்சென்டு கொடுத்து வாழ்த்து தெரிவித்தார்.

அப்போதுதான் தனக்கு சூர்யா விருந்து கொடுக்க அழைத்து வந்திருப்பதை புரிந்துகொண்டார். சூர்யாவுக்கும் பட குழுவிருக்கும் சந்தோஷ் சிவன் நன்றி தெரிவித்தார்.