உலகக் கோப்பை கிரிக்கெட்: நெதர்லாந்தை துவம்சம் செய்த இலங்கை

வங்கதேசத்தில் நடைபெற்று வரும் 20 ஓவர் உலகக்கோப்பை கிரிக்கெட் தொடரில் இன்று நடைபெற்ற லீக் ஆட்டத்தில் இலங்கையும் நெதர்லாந்தும் மோதின. டாஸ் ஜெயித்த இலங்கை அணி பீல்டிங்கை தேர்வு செய்தது. பலமான அணிக்கு எதிராக தடுமாற்றத்துடன் பேட்டிங்கைத் தொடங்கிய நெதர்லாந்து அணிக்கு மரண அடி விழுந்தது. 

அந்த அணியின் முன்வரிசை வீரர்களில் கூப்பர் என்பவர் மட்டுமே இரட்டை இலக்க ரன்கள்(16) எடுத்தார். மற்ற அனைவருமே இலங்கையின் பந்து வீச்சில் பணிந்து விட்டனர். இந்த அணியின் பேட்ஸ்மேன்கள் 5 பேர் டக் அவுட்டானார்கள். முடிவில் அந்த அணி 39 ரன்களுக்கு ஆல் அவுட்டானது. இலங்கை தரப்பில் மேத்யூஸ், மென்டிஸ் தலா 3 விக்கெட்டுகளும், மலிங்கா 2 விக்கெட்டுகளும் வீழ்த்தினர். 

இதையடுத்து 40 ரன்கள் எளிய இலக்கை நோக்கி களமிறங்கிய இலங்கை, பெரேராவின் விக்கெட்டை மட்டும் இழந்து 5 ஒவர்களில் வெற்றி இலக்கை எட்டியது. அயர்லாந்துக்கு எதிரான கடந்த ஆட்டத்தில் வாணவேடிக்கை காட்டி உலக சாதனை நிகழ்த்திய நெதர்லாந்து, இன்றைய ஆட்டத்தில் யானையிடம் மாட்டிய எலியாக வீழ்ந்து விட்டது.